BASES REGULADORAS DO PROGRAMA “LECER EN FAMILIA” 2025

O programa “Lecer en familia” 2025 contará con 2.957 prazas.

O ámbito temporal de execución deste será entre o cuarto trimestre do ano 2025 e o primeiro trimestre do 2026.

O programa “Lecer en familia”, destinado a familias empadroadas na provincia de Pontevedra, configúrase como un poderoso axente de socialización para desenvolver habilidades sociais e crear tempo de lecer de calidade no que propiciar o benestar e a satisfacción persoal mediante emocións, sentimentos e afectos positivos.

Ao ofrecer un programa específico para familias en establecementos hoteleiros da provincia estamos contribuíndo directamente a promover o tempo de calidade en familia, a apoiar a convivencia e a fomentar o benestar físico e mental, ademais de proporcionar unha opción de lecer que contribúe a mellorar de forma global a calidade de vida das familias e cumprir así coas directrices desta importante lexislación galega.

A finalidade do programa é reforzar os lazos familiares nun ambiente de convivencia que permita desconectar do estrés diario e gozar dun ocio de calidade en familia, reactivando emocións positivas para todos os seus membros, a través de actividades destinadas a mellorar a comunicación familiar; fomentando a diversión compartida e a construción de recordos; e desenvolvendo a autoestima e a autoconfianza, ao tempo que favorece o desenvolvemento da autonomía.

1. Poderán ser beneficiarias todas as persoas integrantes dunha unidade familiar con menores a cargo que teñan a súa residencia na provincia de Pontevedra.

2. Ademais do anterior, os membros da unidade familiar que desexen participar deberán acreditar o parentesco ata o primeiro grao por consanguinidade e/ou afinidade coa persoa solicitante e estar empadroados no mesmo domicilio. Exceptúase o requisito de empadroamento no mesmo domicilio no caso de familias que acrediten unha situación de separación ou divorcio legal

Este programa caracterízase por ofrecer unha estancia dunha noite en fins de semana (venres ou sábado), períodos non lectivos ou vésperas de festivos nun hotel da provincia de Pontevedra que, como mínimo, sexa de 3 estrelas: establecementos hoteleiros de tipo balneario, talaso ou spa, e hoteis de zonas urbanas ou rurais, en réxime de media pensión. A entrada nos establecementos será pola tarde e a saída o día seguinte ao mediodía.

Ofrecerase un almorzo tipo bufete e cea con dous pratos e sobremesa, incluídas as bebidas non alcohólicas, así como un menú infantil para menores de 3 a 12 anos (ambos incluídos). A cea poderá realizarse nun restaurante próximo ao establecemento no que pase a noite a familia, o que se recollerá xunto cos establecementos ofertados no anexo I.

As 2.957 prazas ofertadas estarán repartidas nas seguintes modalidades:

• 2.907 prazas de réxime xeral: a Deputación subvencionará 60 euros do custo total da praza para as persoas maiores de 12 anos e 30 euros para as de 3 a 12 anos (estas incluídas). O prezo das prazas destas e destes menores será o 50 % do prezo da praza de persoa adulta ou maior de 12 anos, mentres que as e os menores de 3 anos irán de balde.

• 50 prazas de réxime especial: a Deputación subvencionará o 100 % do prezo de adxudicación.

Poderán optar ás prazas de réxime especial as persoas que cumpran os requisitos establecidos e que sexan beneficiarias da renda de inclusión social de Galicia (RISGA) ou perceptoras do ingreso mínimo vital (IMV).

O prazo para a presentación de solicitudes será do 2 ao 16 de maio de 2025.

https://boppo.depo.gal/web/boppo/detalle/-/boppo/2025/04/24/2025024769