Nesta web as cookies son utilizados para fins estatísticos para optimizar a función e, así, proporcionar contidos adaptados aos seus intereses. Se preme "continuar", concordas con estas condicións. Máis información

Loading...

Emprego A Estrada

Venres, 03 Agosto 2018 06:49

CONCURSO INNOVATIA 8.3 ÁS MELLORES INICIATIVAS EMPRESARIAIS DE BASE TECNOLOXICA LIDERADA POR MULLERES

A USC e o Instituto da Muller convocan a primeira edición do concurso Innovatia 8.3 ás mellores iniciativas empresariais de base tecnolóxica lideradas por mulleres.

A primeira edición do Concurso Innovatia 8.3 premiará as mellores iniciativas empresariais creadas co apoio das universidades e lideradas por mulleres. Esta e unha iniciativa convocada pola USC e o Instituto da Muller e para a Igualdade de Oportunidades á que poderán concorrer aquelas iniciativas empresariais ou empresas con presenza maioritaria de mulleres nos seus consellos de Dirección ou de Administración e que teñan contado co apoio de universidades españolas. 

O Concurso, cofinanciado polo Fondo Social Europeo pretende fomentar o espírito empresarial das mulleres no ámbito científico-tecnolóxico, ademais da creación dun modelo de intervención que integre a perspectiva de xénero nos procesos de transferencia de coñecemento e no proceso de creación de empresas de base tecnolóxica na contorna universitaria. Innovatia 8.3 constitúese como unha ferramenta para as universidades españolas que fomenta a creación deste tipo empresas lideradas por mulleres, dando valor ao coñecemento universitario e visibilizando as universitarias.

A convocatoria contempla dúas modalidades: a de iniciativa empresarial de base tecnolóxica, dotada de 10.000 euros de premio en metálico e asesoramento personalizado durante seis meses por unha profesional referente no sector; e a de iniciativa empresarial Startup, premiada con 7.000 euros e asesoramento personalizado durante tres meses por unha profesional referente no sector.

A valoración das iniciativas empresariais presentadas nas dúas categorías corresponderá a un comité composto por persoal experto e independente. Integrarano cinco persoas: dúas procedentes de sociedades de capital risco que xestionen fondos específicos para transferencia de tecnoloxía; outras dúas procedentes de redes OTRI que formen parte do grupo de traballo de Spin-off especializadas en facilitar os procesos de creación destas sociedades nas universidades; e unha persoa en representación de asociacións empresariais ou directivas a nivel nacional.

O comité avaliará a viabilidade económica e financeira dos proxectos; así como o grao de innovación do produto, proceso ou servizo; o volume de emprego creado ou proxectado; o carácter multidisciplinar do equipo promotor; e ter en consideración políticas de igualdade.

O prazo de presentación de propostas estenderase ata o próximo 10 de setembro.

Información: http://xornal.usc.es/xornal/acontece/2018_07/noticia_0108.html